BiZZY - Politik Ranbousman

Kijan Peman Sekestre a Fonksyone

Lè w fè yon kòmand sou BiZZY, lajan w peye a pa ale dirèkteman bay machann nan. Li rete "an atant" (sekestre) nan sistèm BiZZY jiskaske youn nan de bagay sa yo rive :

Livrezon konfime ak kòd PIN. Lè w resevwa kòmand ou an, ou bay livrè a oswa machann nan kòd PIN 4 chif ki te parèt sou resi kòmand ou an. Kòb la lage bay machann nan touswit apre sa.
Liberasyon otomatik apre dat limit livrezon an. Si machann nan make kòmand lan "ekspedye" e ou pa peze "Mwen pa resevwa l", sistèm nan libere kòb la otomatikman bay machann nan 48 èdtan apre dat limit livrezon an (jamè anvan 24 èdtan) — menm si w pa t bay kòd PIN lan.

Pa janm bay kòd PIN ou a AVAN w fin resevwa pwodwi w te kòmande a. Kòd sa a se prèv ou konfime livrezon an te fèt byen.

Dat Limit Livrezon

Chak machann gen yon dat limit pou l ekspedye kòmand ou an, dapre kote w ye pa rapò ak kote boutik la ye :

Sitiyasyon	Dat limit
Kliyan ak boutik nan menm depatman	24 èdtan
Kliyan ak boutik nan 2 depatman diferan	3 jou

Si machann nan pa respekte dat limit sa a san yon bon rezon, ou gen dwa mande yon ranbousman konplè (gade seksyon "Ranbousman" anba a).

Ki Lè Ou Gen Dwa Yon Ranbousman

BiZZY ranbouse kliyan an (san okenn penalite pou li) nan ka sa yo :

Machann nan pa ekspedye kòmand lan anvan dat limit livrezon an (gade tablo pi wo a).
Pwodwi w resevwa a pa menm ak sa w te kòmande a, oswa li domaje/kase depi lè l rive.
Machann nan anile kòmand lan li menm (egzanp: pwodwi a pa gen stòk ankò).
Ou pa janm resevwa kòmand lan menm apre dat limit la pase.
Vandè a pa konfime peman NatCash ou te fè a, oswa li refize kòmand lan apre w fin peye.

            100% nan lajan w peye a (pwodwi + livrezon) ranbouse nan ka sa yo — okenn fre pa retire.
        

Pou kòmanse yon demand ranbousman, ale nan Kòmand Mwen Yo epi peze bouton "Mwen pa resevwa l" sou pòsyon kòmand ki gen pwoblèm nan (li parèt depi boutik la voye kòmand lan).

Konsekans pou Machann yo

Chak fwa yon machann echwe yon livrezon (kòmand ranbouse pou fòt li), sistèm BiZZY retire otomatikman 15 pwen nan eskò repitasyon boutik la.

Si eskò repitasyon yon boutik desann anba 50 pwen, kont boutik la bloke otomatikman — machann nan pa ka resevwa nouvo kòmand ankò jiskaske li kontakte sipò BiZZY pou rezoud sitiyasyon an.

Sa a pwoteje kliyan BiZZY yo kont machann ki pa serye, epi ankouraje tout vandè yo respekte dat livrezon yo.

Ranbousman Dapre Metòd Peman

Kach nan Livrezon : depi w poko peye anyen, pa gen okenn ranbousman ki nesesè — kòmand lan senpleman anile. Si vandè a make kòmand lan "livre" men ou pa t resevwa l, ou gen 48 èdtan pou w peze "Mwen pa resevwa l": ekip BiZZY ap egzamine ka a, e si w gen rezon, kòmand lan anile e vandè a penalize.
MonCash / NatCash : ranbousman fèt tounen sou menm kont mobil ou te itilize a pou peye a. Sa ka pran jiska 72 èdtan pou l parèt sou kont ou.
Peman atravè yon ajan : si lajan an pa rive sou pòtfèy BiZZY a oswa montan an pa ase, ekip la refize peman an epi di w poukisa (ou ka soumèt ankò). Si yon pati te rive, BiZZY ranbouse l sou nimewo kont ou bay la. Frè ajan an pa ranbousab.
Depo imobilye : depo a rete an eskwo jiska vizit/siyati a. Si vizit la pa fèt pa fòt vandè a (anons fo, pwopriyete pa disponib, vandè absan), BiZZY ranbouse 100% depo a. Si se kliyan an ki chanje lide apre li fin bay PIN lan, depo a pa ranbousab — pa janm bay PIN lan anvan w fin vizite.

Bezwen Èd?

Si w gen yon kesyon oswa yon konfli ki pa rezoud otomatikman pa sistèm nan, kontakte ekip sipò BiZZY a — n ap reponn ou nan pi vit posib. Bay nimewo kòmand lan pou nou jwenn li vit.