Dènye mizajou: 15 oktòb 2026
Politik sa a esplike ki enfòmasyon BiZZY ("BiZZY") kolekte lè w itilize sit la, poukisa, ak ki moun ki ka wè yo. Nou kolekte sèlman sa nou bezwen pou platfòm nan mache e pou pwoteje kliyan ak vandè yo.
1. Enfòmasyon nou kolekte
Kliyan (achtè)
- Non, nimewo telefòn, imèl (si w bay li), adrès livrezon, referans adrès ak depatman.
- Foto pwofil ou (Si ou vle). Se sèlman ou menm ak ekip BiZZY ki wè l: li pa montre bay lòt kliyan ni vandè. Ou ka retire l nenpòt lè nan Pwofil ou, e li efase ak kont ou.
- Kòmand ou yo, favori, pwodwi ou gade, avi ou bay ak mesaj ou voye bay vandè yo sou BiZZY.
Vandè
- Non, prenon, imèl, telefòn, adrès ak depatman boutik la, logo ak deskripsyon boutik la.
- Nimewo ID (CIN/NIF) ak foto ID pou verifikasyon idantite.
- Nimewo MonCash/NatCash pou resevwa kòb, istorik vant, balans ak retrè.
- Pwodwi, anons imobilye/lwe, foto ak videyo yo pibliye.
Peman
- Referans tranzaksyon MonCash/NatCash ak montan an, pou nou ka verifye peman an e jere eskwo a.
- Foto resi peman (si w voye youn olye tape kòd la): li estoke nan yon dosye prive, metadone foto a (egz: pozisyon GPS telefòn nan) retire otomatikman, e se sèlman ekip finans BiZZY ki ka wè l pou verifye peman an. Li kenbe menm tan ak lòt prèv peman yo (seksyon 6).
- BiZZY pa janm resevwa ni kenbe modpas oswa kòd PIN kont MonCash/NatCash ou.
Done teknik
- Yon bonbon (cookie) sesyon pou kenbe w konekte ak kenbe panye w. Nou pa itilize bonbon piblisite.
- Mezi odyans (Google Analytics ak Meta Pixel) — aktive pa defo pou nou ka amelyore sit la. Google ak Meta (Facebook/Instagram) resevwa paj ou gade, kalite aparèy, peyi/vil apwoksimatif, ak pwodwi ou gade, mete nan panye oswa achte (non pwodwi, pri, kantite). Meta ka itilize enfòmasyon sa yo pou montre piblisite BiZZY bay moun ki deja vizite sit la, e pou mezire si piblisite nou yo mache. Nou pa janm voye non, telefòn, imèl ni adrès ou. Ou ka dezaktive l nenpòt lè: klike Dezaktive / chanje mezi odyans; apre sa zouti sa yo pa chaje ditou sou aparèy ou an. Si navigatè w voye siyal « Global Privacy Control », nou respekte l otomatikman.
- Adrès IP ak dat koneksyon, pou sekirite (egz: bloke moun k ap eseye devine modpas) ak pou jounal aksyon ekip admin lan.
- Kèk preferans estoke sèlman nan navigatè w (tèm klè/fonse, dènye depatman livrezon ou chwazi, bouyon yon fòm).
- Jounal erè teknik (paj, dat, mesaj erè) pou ekip la ka korije pwoblèm sit la — kenbe sou sèvè a sèlman, pa janm pataje.
2. Poukisa nou itilize yo
- Trete kòmand ou yo, kalkile frè livrezon, jere peman sekestre a ak kòd PIN livrezon an.
- Voye notifikasyon sou kòmand ou (sou sit la, pa imèl, oswa pa WhatsApp).
- Verifye idantite vandè yo, kalkile repitasyon yo, trete kontestasyon ak ranbousman.
- Pwoteje platfòm nan kont fwod, abi ak aksè san otorizasyon.
- Amelyore sit la (estatistik jeneral sou vant ak vizit).
- Respekte obligasyon legal ak kontab nou.
Nou pa itilize done ou pou piblisite pou lòt konpayi, e nou pa vann done pèsonèl ou.
3. Ki moun ki ka wè enfòmasyon ou
- Vandè a wè non, telefòn ak adrès livrezon ou SÈLMAN pou kòmand ou fè nan boutik li, pou l ka livre w.
- Lòt vizitè wè enfòmasyon piblik boutik yo (non, logo, depatman, repitasyon) ak avi yo (avi yon kliyan parèt ak premye non li ak premye lèt siyati li sèlman) — janm ID, adrès prive oswa nimewo peman. Nimewo WhatsApp boutik la parèt sèlman si vandè a chwazi montre l.
- Ekip BiZZY (admin) wè done yo selon wòl yo, pou sipò, moderasyon ak finans. Chak aksyon enpòtan anrejistre nan yon jounal.
- Tout Sèvis: lè w poste yon pwoblèm, deskripsyon an, foto a, premye non w ak depatman w parèt PIBLIKMAN sou fil Tout Sèvis la (tankou yon gwoup), ansanm ak repons pwofesyonèl yo. Adrès egzak ou ak nimewo w PA parèt piblikman. Non ak nimewo telefòn ou parèt SÈLMAN pou pwofesyonèl ki chwazi ede w (maks 3), pou yo ka rele w. Ou ka fèmen demann nan nenpòt lè.
- Mesaj ant kliyan ak vandè (tèks ak vokal, menm sa ki efase oswa modifye) ka li pa ekip BiZZY (Super admin sèlman) pou rezoud yon diskisyon, verifye yon plent oswa anpeche fwod ak abi. Ekip la pa ekri nan konvèsasyon yo, e chak fwa yon admin louvri youn sa anrejistre nan jounal aksyon an. Pa janm voye modpas, kòd PIN oswa enfòmasyon kont bank nan mesaj yo.
- Founisè sèvis ki ede nou fè sit la mache: Digicel (MonCash) ak Natcom (NatCash) pou peman, Meta (WhatsApp) pou notifikasyon, Google (Gmail) pou imèl ak Google Analytics pou mezi odyans, Meta Pixel pou mezi piblisite (ou ka dezaktive l), ak konpayi ki ebèje sit la. Yo resevwa sèlman sa ki nesesè pou sèvis la.
- Otorite yo, sèlman si lalwa oblije nou oswa pou pwoteje moun kont yon fwod grav.
4. Foto ID vandè yo
Foto ID yo estoke nan yon dosye prive ki pa aksesib sou entènèt. Se sèlman ekip verifikasyon BiZZY ki ka wè yo, pou verifye idantite vandè a.
5. Sekirite
Nou pwoteje done yo ak: koneksyon chifre (HTTPS), modpas ak kòd PIN ki estoke chifre (hash), otantifikasyon 2 etap pou ekip admin lan, aksè limite pa wòl, limit sou tantativ koneksyon, ak kopi sekirite (backup) regilye. Okenn sistèm pa 100% pafè: si nou dekouvri yon fwit done ki ka fè w tò, nou ap avèti w.
6. Konbyen tan nou kenbe done yo
- Pandan kont ou aktif.
- Kòmand, peman ak retrè: jiska 5 an apre dènye tranzaksyon an, pou kontabilite, kontestasyon ak prevansyon fwod.
- Kopi sekirite (backup) yo efase otomatikman apre 35 jou maksimòm.
7. Dwa ou
Ou ka mande nou: yon kopi enfòmasyon nou genyen sou ou, korije yon enfòmasyon ki pa kòrèk, oswa efase kont ou. Ou ka korije pifò enfòmasyon ou dirèkteman nan paj profil ou. Pou lòt demann yo, kontakte nou (seksyon 10): n ap reponn nan 30 jou maksimòm. Nou ka kenbe sa lalwa oswa yon kontestasyon an kou oblije nou kenbe.
8. Timoun
BiZZY pa fèt pou moun ki poko gen 18 an san pèmisyon yon paran. Si w panse yon timoun ba nou enfòmasyon san pèmisyon, kontakte nou pou nou efase yo.
9. Chanjman nan politik sa a
Nou ka mete politik sa a ajou. Dat "Dènye mizajou" anlè paj la montre vèsyon aktyèl la. Si chanjman an enpòtan, nou ap avèti itilizatè yo sou sit la.
10. Kontakte nou
Gade Kondisyon Itilizasyon nou an →